Gastronomie im Wandel der Zeit...

I de vergangene Jahr het sich dGastronomie sehr veränderet.
D`Jahr 2020 u 2021 mitem ganze Corona-Wahnsinn
hei dGastronomie total u langfrischtig ufe Chopf gstellt.
-U natürlech nid nume dGastronomie!
Mir ir Falkeflueh-Stube hei die Zyt nume dank üsne tröje Stammgescht
u äm Mahlzytedienscht überstande. Äs isch berüehrend u motivierend gsy,
z`gseh das z`chlyne Ahgebot mit Wuche-Hit, Samschtig-Menü u Bachware
so rege isch bstellt worde, dases üs het zÜberläbe gsicheret!
Usserdäm het üse Vermieter ä Tag nach Lockdown signalisiert,
das är o wür uf dMieti verzichte falls mir zweni Umsatz chönnte generiere.
Die Tatsach isch sehr beruhigend gsy.
"Trotz allem, Glück gha!"
Im vergangene Jahr 2022, hei mir probiert zum Alltag zrugg zfinde.
Gschpüre wases vo üser Syte här brucht, für di Veränderige uf z`fah,
nöji Überlegige zuelah u dr Muet ha, o unschöni oder nid willkommeni
Tatsache z`akzeptiere, flexibel z`sy u öppis drus z`mache.
Genau so isches zu de nöje Öffnigszyte cho!
Mir wage dr Spagat zwüsche flexible u feschte Öffnigszyte!
Mitem Samschtig hei mir das scho vor einiger Zyt lanciert u äs funktioniert sehr guet!
Jetz tüe mir das System uswyte.
Mir eliminiere dermit di zermürbende Tage, wo zLiecht brönnt, dGrät louffe, Mis en Place gmacht isch u mir (oft vergäbe) uf Gaschtig warte...
Vom nöje System erhoffe mir üs ä Gwinn für beidi Syte. Dr Gascht isch mit syre
Reservation nid bunde ane Wuchetag u mir dörfe denn Gaschtgäber sy wes
gwünscht u gschetzt wird. Usserdäm agiere mir im Bereich Läbensmittelverschwändig
u optimiere so dWirtschaftlechkeit vor Falkeflueh-Stube.
So das mir de rückblickend hoffentlech no einisch chöi säge:
"Trotz allem, Glück gha!"

Ig wünsche Öich ä wunderschöne, bunte u sunnige Herbscht mit
vielne unvergässlech schöne u z`fridene Momänte,
interessante Erläbnis u beglückende Begägnige!

Ig fröje mi über Öje Bsuech, Öji Reservation oder Bstellig! 077 460 26 06

Häbets zfride, Maja
 

Mini persönleche Fiirtage wo dFalkeflueh-Stube zue isch:

-Am 22. Juli

-Am Gurnigel-Renne (2025 isch das am 13. & 14. Septämber)

-Am 1. Mittwuch im Oktober (2025 isch das dr 1.Oktober)

-Am 1. Sunntig im Novämber (2024 isch das dr 3. Novämber)